U23亚洲盃C组末轮大战，中国U23硬撼伊朗U23；中国小组头2仗全败后已无缘晋级，战意成疑，相反伊朗机会争入8强，呢场唔止要争3分，还要多入波提升得失球差成绩，肯定狂攻中国，质素平庸的国足小将难逃一劫，伊朗大胜可期。（Now 670、有线612及652台周三晚6时15分直播）

中国过往喺U23亚洲盃从未试过挺进淘汰赛阶段，今届球队喺FC山东技术总监郝伟带领下，表现亦未见有起色，2战全败，提早同2020东京奥运男足资格讲拜拜。分组赛首战面对南韩，中国喺比赛末段先至失守输0比1，都还可以说唔好彩，不过次战面对衞冕嘅乌兹别克，中国完全被技术性击倒，最终0比2吞败，2仗1球都入唔到，令人怀疑呢班国足小将嘅质素。中国虽然踢法以防守为主，不过久守必失，加上头号前锋张玉宁因伤缺阵，而上位担正嘅杨立瑜亦冇料到，缺乏还手之力嘅情况下，呢场随时又要捱打。

伊朗寄望南韩帮手
伊朗小组赛2战1和1负得1分，出线形势告急，除要寄望另一场南韩可以击败乌兹别克，今场面对中国一定要大胜，希望能靠得失球差成绩压过衞冕之师，取得8强席位。犹幸伊朗球员无论技术或体能都远胜中国，质素有保证，呢场势必禁住国足小将嚟砌，伊朗U23大胜可期。截稿前马会仍未公布U23亚洲盃赛事编号，有冇受注要留意马会今日公布。