往绩硬淨靠得住
英超圣诞快车嚟到第2站，周六凌晨狼队将会主场迎战「3哥」曼城。力争衞冕嘅「蓝月亮」，今季整体表现不及过去两季，尤其后防甩漏情况时有发生，相反狼队近年对住曼城绝对不落下风，呢场有力再抢分，呢仗主队受让1/1.5球一于吼实狼队下盘。

（Now 611及621周六凌晨3时45分直播）

曼城过去两季都成功喺英超捧盃，不过比起第一季长期佔据积分榜榜首做惯「1哥」，上季「蓝月亮」嘅衞冕之路已经显得崎岖得多，嚟到今季联赛失分情况更加严重，加上利物浦同异军突起嘅李斯特城等竞争对手持续强势，令曼城焗住要追车尾灯，如今係时候要考验领队哥迪奥拿同阵中球星嘅韧力。

后防不济累曼城跌watt
查实曼城靠奇云迪布尼同贝拿度施华等中场好手压阵，比赛中控球优势依然明显，问题在于佢哋能否应付对手嘅反击。自从主力中坚拿朴迪季初重伤要长抖后，哥迪奥拿对后防人选一直举棋不定，防中费兰甸奴虽然被委以重任顶替中坚位置，可惜呢位巴西球星镇守防线嘅表现始终畀唔到人信心，曼城近各项赛事近13场仅1次保持到清白身，对住擅长打反击嘅对手仲经常出现险情，呢场后防随时再有甩漏。

狼队近年喺领队纽奴带领下，表现够硬淨，成功稳站积分榜前半版有利位置，甚至有机会再次冲击欧战席位。墨西哥射手鲁尔占美尼斯联赛至今已经斩获7球，包括上仗面对诺域治射入致胜1球，配合边路快翼艾达马查奥尔，狼队火力有保证。回顾往绩，狼队近5次同曼城交手，法定时间内只係输过1次，今季首循环交手仲曾靠两次犀利反击以2比0赢波，可见佢哋对住「蓝月亮」特别有心得，呢次主场出击随时再有机会抢分，狼队下盘捧得过。