Goal手云集以色列
周二凌晨国际热身赛上演「南美对决」，由阿根廷同乌拉圭喺中立场以色列交锋。双方王牌前锋美斯、卡云尼及苏亚雷斯上场回归国家队即有好表现，众多入球好手压阵，相信今场会更放开怀抱斗攻，波童拣中位数2.5球入球大。

（周二凌晨3时15分开赛）

美斯复出即有士哥
阿根廷及乌拉圭踢完今夏美洲盃后，踢咗5场热身赛，头4场同样冇徵召一班旧有主力包括美斯、阿古路、卡云尼及苏亚雷斯等等，直至上场先重召佢哋入伍。除咗阿古路冇份出场，其馀3人都交足功课。当中停赛刑满复出嘅美斯，喺对巴西嘅热身赛补中12码一箭定江山，协助阿根廷击败死敌，而且呢位巴塞球王全场表现活跃，如果唔係单刀及罚球畀对方门神艾利臣比加救出，美斯应该唔只入1球。咪忘记除咗佢同阿古路，阿根廷仲有祖记射手保罗戴巴拿同国米箭头拿达路马天尼斯候命，佢两位今季入球数字都唔少，可见阿根廷锋力之强大。

至于卡云尼就喺乌拉圭赢匈牙利2比1场波先开纪录，拍档苏亚雷斯踢咗半场亦交出一次助攻，演出保持水准，效力华伦西亚嘅麦斯高美斯喺西甲更已轰入5粒，同样值得留意。两军近况、状态都半斤八両，加上近4次交手，3次分出胜负都只係一球上落，剩馀1次打成平手，往绩可谓难分高下，今场名副其实属五五波。既然两队锋线目前都叫齐脚，夫添之下应会合力炮製唔少入波，捧大盘最好路。