今晚欧国外F组煞科战，西班牙主场斗罗马尼亚。稳夺小组首名出线嘅「狂牛兵团」，或会试阵畀班主力休息下，但有得上阵嘅「边缘人」为博表现唔会Hea踢，加埋主场气势一开波必抢，半场主胜唔好错过。

（香港开电视77台、有线602及662台周二凌晨3时45分直播）

西班牙小组可以话一枝独秀，9战豪夺7胜2和，提前锁定首名跻身决赛周。作为曾连续两届欧国盃封王嘅传统劲旅，「狂牛兵团」有咁嘅表现算係正常发挥，虽然过程中冇受到太大考验，不过主帅罗拔摩兰奴似乎一直未搵到最佳阵容，好彩佢哋人才济济，其中上仗有波入嘅前锋谢拉特摩兰奴，今季喺西甲高踞射手榜前列，入选国家队延续勇态，加上老将辛迪卡索拉同堤亚高艾简达拿等中场为争取未来国家队席位，肯定尽骚哥利，战意唔使怀疑。西班牙近4仗主场有3次半场就领先，对住提早出局嘅罗马尼亚，半场主胜值得支持。

意军勒唔住炒得起阿美尼亚
另外喺J组同样「线已出」嘅意大利，主场迎战阿美尼亚。意大利全面复甦小组9战全胜，各项赛事更做出10连胜佳绩，走势一发不可收拾，其中拖连奴射手比洛迪已逐渐坐稳正选前锋席位，近两仗斩获3球弗到漏，反观阿美尼亚出线无望，战意成疑，头号球星米希达利恩缺阵，实力进一步削弱，睇怕难逃大败厄运，一于吼实让球主胜。

（有线605台周二凌晨3时45分直播）