哈神孙兴民争士哥破纪录
今晚英超尾场热刺作客爱华顿，热刺前锋哈利卡尼同孙兴民再有入波就破纪录，可惜防线危机未解决，想唔失波谈何容易；爱华顿排名令人失望，为求谷底反弹主场必抢攻，两军近年碰头例演入球骚，2.5球嘅大盘有买趁早。

（Now 621及611周一凌晨零时30分直播）

热刺今季成绩走样，不过哈利卡尼及孙兴民等射手仲有货交。原来「哈神」之前4次对爱华顿都梅开二度，若然今仗再省两粒，就会成为英超史上首位连续5次对同一支球队都「起孖」嘅球员，而「老孙」啱啱获选为2019年南韩人最喜爱体育明星，佢依家喺外流欧洲生涯累积121个士哥，只要入多粒就可超越前辈「黑色匕首」车范根，成为喺欧洲球坛入波最多嘅南韩球员。

不过热刺防线大不如前，除咗维顿汉及艾达韦列特受续约问题困扰外，左闸丹尼路斯今场要坐波监，真係雪上加霜。热刺自今年1月击败富咸后，已跨季11场联赛作客不胜，其中输咗9次，今季客战2和3负场场有失波，总入球全开3球或以上，防线弱过药煲。

近5次交锋共炮製24个入波
爱华顿近6场联赛只得1胜5负同样曳爆，上轮就以2比3反输畀下游球队白礼顿，令主帅马高施华再陷被炒边缘。好彩李察利臣喺日前英联盃打破近期入球荒，面对热刺豆腐防线有鸡偷。两军近5次碰头共炮製24个士哥，全开3球或以上，2.5球大盘好路。