巴西晋级实至名圭
 
美洲国家盃8强最后一战：巴西将会遇上巴拉圭挑战，巴西肯定续有尼马停赛，而佢哋似乎都已经冇就上诉存任何希望，因为尼马都已经离队回到老家休息，不过上仗见佢哋缺尼马下攻力未有太大影响，而巴拉圭续靠几个老将撑场，但分组赛只赢过大鱼腩牙买加，球队防守力亦一般，睇怕都阻唔到巴西杀入4强。（周六19，now681台周日5:30am直播）
 
巴拉圭能够杀入次圈赛事，已经爆出极大冷门，除咗多得阿根廷首仗轻敌送咗1分俾佢哋外，更要多得同组仲有队牙买加，以及缺苏亚雷斯嘅乌拉圭，几个运气因素加埋令到佢哋出线8强。
 
事实上，巴拉圭喺过去世界盃外围赛已经喺南美赛区包尾，队中主力都仍然係巴里奥斯同希度华迪斯，青黄不接问题非常严重，而经过密集嘅分组赛后，呢班老鬼身心俱疲，要继续出现奇迹似乎不太可能。
 
巴西喺今届赛事所表现出嘅斗志，似乎係有心同智利争一日长短，不过好衰唔衰，分组赛又撞上剋星哥伦比亚，世界盃时两强相遇，当时哥伦比亚整伤尼马亦令堤亚高施华停赛，结果巴西4强大败俾德国，而到美洲国家盃，又令到尼马红牌停赛4场，虽然话就话足球係团体运动，但关键时刻有冇尼马好重要，嚟紧如果巴西出线都係争啲霸气。
 
不过，4强嘅事都係打后再讲，巴西今场续有刚转投利物浦嘅费明奴挂帅，此子上场攻入1球，而防线亦冇人伤停，就算唔可以大炒巴拉圭，都至少唔会输到好似打德国时咁惨，邓加带队向来以目标为本，睇佢哋上场赢委内瑞拉，入2球后缩后输番粒，唔求悦目只求结果，睇嚟呢场会历史重演，巴西随时又係1球货仔入4强。