巴甲煞科，十場賽事同時間進行，其中護級大戰由排第十五嘅哥列迪巴主場硬撼尾三球隊華斯高。華斯高唔單止要贏，仲要望前面嘅球隊失分才可逃出生天，今仗勢必豁出去搶攻，隨時畀未上岸嘅哥列迪巴「火燒後欄」，哥軍小讓平半值得捧場。

（周一凌晨3時開賽）

由於哥連泰斯已於聯賽封王，並且聯同明尼路、甘美奧穩奪自由盃入場券，今輪煞科都係例行公事。正所謂季尾波戰意行先，斯維寧願留意仍要為護級搏命嘅球隊；巴甲最尾四隊需要降班，依家只有包尾嘅祖恩維爾篤定下季乙組再見，排第十五嘅哥列迪巴與尾三嘅華斯高只差三分，咁蹺今輪兩軍正面交鋒，真係好睇過戲。

睇番積分榜，華斯高因得失球較差排在同得四十分（勝出場數亦相同）嘅費古倫斯之後，落後尾五嘅艾華爾一分，因此今仗不但要擊敗哥列迪巴擸晒三分，仲要費古倫斯同艾華爾齊齊贏唔到，先至有機會護級成功，難度極高。

哥軍3連勝上盤抵玩
當然華斯高亦冇得諗咁多，首先要做好本分贏咗先講，除咗進攻中場安達仙奴要坐波監外，今仗可夫添出擊，挾住近四仗贏三場嘅強勢，必定狂攻哥列迪巴。

不過，哥列迪巴原則上今仗和波攞一分先可上岸，華斯高谷得太上，隨時畀哥列迪巴狂打反擊；若果比賽中途收到費古倫斯或艾華爾領先嘅消息，甚至會打擊華斯高士氣，變數太多。加上哥列迪巴之前連贏三仗，狀態托弗今仗贏埋唔奇，哥軍小讓平半，上盤乃不二之選。