德甲頭場史特加主場迎戰雲達不來梅，兩軍實力有限近期亦同處低潮，不過史特加新帥上任冇耐仲有希望，球隊板斧亦較質庸嘅不來梅多，主場出擊可望全取3分，推介1.8倍主勝。
（now 670、有線61及64台周日晚10時30分直播）
史特加近期3連敗每仗都失4球，不過上仗新帥卡藍尼初上任即要作客對多蒙特，輸波屬意料之中，但總算有攻有守戰意可嘉，球隊輸波後即埋首備戰，皆因難得主場迎戰弱旅，全隊上下都視為重響勝鼓良機。
不來梅自廢得分殺着
卡藍尼今晚初次喺主場領軍，即遇上老朋友，皆因不來梅教練史基尼克同佢一樣由球會青年軍教練扶正，兩人亦係2007年德國足總教練文憑畢業嘅同學，相比之下史基尼克近期更心煩，不來梅上季聯賽排第10，主要靠死球得分，上季有24個入球來自死球係德甲之冠，但史基尼克強調紀律之餘忽略咗死球戰術，今季佢哋只有兩個入球來自死球，變咗德甲最差，換言之失去最強得分武器。
不來梅近10場聯賽輸咗8場，係德甲入面近況最曳球隊，上輪北部打吡主場遭漢堡打爆，士氣受挫，今晚作客史特加都係凶多吉少。
