拉素「恐祖症」未踢先腳軟
意甲今晚有場重頭戲，由近來全面回勇嘅祖雲達斯作客拉素。祖雲達斯經過「阿里基11月效應」後，聯賽連勝4仗衝上第5位，重拾意甲王者霸氣。相反拉素意甲成績大幅插水，加上球隊上至主帥，下至球員都齊齊患上「恐祖症」，更加唔使旨意佢哋識還拖，祖記呢鋪小讓平半梗係撐1.9倍上盤！

（TVB301、中央5台周六凌晨3:45直播）

「斑馬軍團」季初成績曳爆，頭10場聯賽只係攞得12分，甚至仲一度喺降班區域徘徊。好在主帥阿里基過去無論教卡利亞里、AC米蘭定上年嘅祖記都好，球隊狀態總會喺11月迎來高峰，「班馬軍團」亦憑住呢個「阿里基11月效應」，上個月6戰取得5勝1和，唔單止鎖定歐聯16強席位，聯賽亦連勝4鋪升至第5位，重燃爭標希望。班波家陣殺氣騰騰，目前完全唔適宜同佢哋作對喎。

祖雲達斯文迪蘇傑翻生
事實上，祖雲達斯自從改踢352陣式，加強兩翼攻勢後，成功令文迪蘇傑翻生。呢位新加盟前鋒近4仗轟入3球，成功融入球隊，由佢拍住首席前鋒保羅戴巴拿攻堅，火力有十足保證，加上中場基迪拉周一復操，就算中場保羅普巴今仗坐波監，球隊依然夠料拿下今季首個5連勝。

相比祖雲達斯強勢反彈，拉素表現明顯被比下去，球隊近5場意甲錄得1和4負差勁成績，當中防線表現直線下滑，對上4鋪聯賽喺換邊前經已失守，堅信唔過。

拉素主帥皮奧利遇剋星
何況呢隻「藍鷹」患上「恐祖症」多年，佢哋對上一次喺聯賽砌低祖雲達斯，已經要追溯至2003年12月。主帥皮奧利亦唔好得去邊，喺意大利執教超過10年，無論盃賽定聯賽對親「斑馬軍團」都冇好結果，合共錄得3和8負。既然成隊波未落場就已經驚到腳仔軟，大家呢次有買趁「祖」啦喂！