唔少球迷睇波都想場比賽多波入，咁今日下晝呢場澳職就啱晒大家心水。墨爾本城今季暫時以18個入球冠絕聯賽，同時佢哋亦失守15次，攻強守弱特點鮮明，今場佢哋作客防守同樣咁差嘅中岸水手，入波仲點會少先？就算入球中位數係2.5/3球，都照捧1.72倍入球大。

（有線64、203周四下午5:00直播）

墨城近6戰喪入15粒
墨爾本城呢期班鋒將真係着晒火，計埋上仗主場大數珀斯光輝5:1，佢哋近6場聯賽勁轟15球，中場阿倫穆爾更頻頻製造威脅，至今交出5次助攻、3個入球，有呢位中場核心穿針引線，就算射手前鋒哥利加美路打柴，都仲有弗爆嘅科拿路利、哈利洛維奴爭取士哥。

水手聯賽8戰失16球
除咗入波多外，墨爾本城失球數字亦唔少，聯賽8戰場場有失波，就算守將艾朗曉士重返大軍，相信亦好難改善後防甩漏多多嘅毛病。更何況主場嘅中岸水手防守同樣咁曳，聯賽場均失2球，之不過班波連續5次鬥墨爾本城例牌有斬獲，似乎已經睇穿對方死穴。既然兩軍防線水鬥水，偏偏進攻各有板斧，呢場入球騷仲邊走得甩！