英冠獨腳戲雷丁主場迎戰昆士柏流浪（ＱＰＲ），ＱＰＲ上場終破入球荒，主場小勝列斯聯1比0，不過呢隊波一向係地頭蟲，作客例牌冇料到，今場睇怕好難偷雞。ＱＰＲ連續九場開出半場和，雷丁近況亦麻麻，今場難以半場搞掂對手，一於捧半場和！

（TVB 301周五凌晨4時直播）

ＱＰＲ由十月底開始，連續四場零入球，王牌射手查理柯士甸變咗失蹤人士，好彩去到上場對戰列斯聯，呢名廿六歲英格蘭鋒將終於協助球隊打破入球荒，亦打破自己兩個多月冇波入嘅悶局，下半場入波助ＱＰＲ險勝。不過ＱＰＲ嘅死穴係作客，上季踢英超已經渣到暈，估唔到降落英冠繼續係咁曳，近五場作客全敗，而且加埋入得一球，認真冇眼睇。雖然ＱＰＲ作客表現曳，雷丁半場都唔一定贏硬，球隊近七戰僅得一勝，球員狀態麻麻，加上過去六次對ＱＰＲ有五次開出半場和，梗係要追喇！

阿馬卡「+1」偷雞陸軍
俄超踢完今輪就會歇冬，榜首莫斯科中央陸軍今晚作客阿馬卡，中央陸軍近況低迷，近五場正式賽事錄得四負一和劣績，睇嚟阿馬卡有偷雞機會，主場受讓值得捧場。

（有線64及203台周四晚10時直播）

最後法甲雷恩主場迎戰馬賽，雖然馬賽作客三連勝，不過對賽往績又唔係食住雷恩，近四次作客都贏唔到對方，今場讓波有暗湧。兩軍近期入得又失得，改捧大盤啱數。

（TVB 302周五凌晨4時直播）