今屆英聯盃殺得性起
英格蘭聯賽盃嚟到8強階段，奪標大熱門曼城喺呢一圈抽中好籤，主場迎戰英冠「老虎」侯城。呢支英超豪門今屆特別鍾意喺英聯盃大開殺戒，加上中場奇雲迪布尼喺主場零舍惡，呢鋪就算冇阿古路幫手都有力炒起對手，1.6倍「讓主」放心追捧。

（TVB301周三凌晨3:45直播）

「藍月亮」今季繼續維持驚人火力，聯賽14戰過後轟入30球，成為英超入波王。雖然射手阿古路上仗對修咸頓受傷，不過主帥比歷連尼強調佢嘅傷勢唔嚴重，但都預佢今仗休息，料由韋菲特邦尼攻堅。好在西班牙中場大衞施華上仗傷愈復出，呢鋪可以落場做奇兵幫手數胡。

藍月亮對上2圈狂轟9球
事實上，曼城喺今屆英聯盃的確殺上癮，對上2圈先後大炒新特蘭同水晶宮4:1、5:1過關，盡現爭標決心。呢鋪佢哋仲要坐擁地利，需知道曼城近7場主場贏6場之餘，仲合共攻入24粒。新加盟嘅奇雲迪布尼更愈戰愈勇，計埋上仗1射2傳，呢位比利時中場今季喺曼城球場出擊，已經斬獲5個入球同6次助攻，今仗再喺鄉親父老面前獻技，侯城準備成為佢刀下亡魂都得咯。

至於對手侯城近排就「老虎變病貓」，近2場比賽拎得1和1負，搞到球隊喺英冠跌落第4位，若然再分心盃賽連累球隊失去升班資格真係得不償失。防線主力居迪斯戴維斯賽前亦暗示，今仗絕唔係佢哋本賽季最重要嘅比賽，相信已經表明咗佢哋嘅態度。

侯城主將 暗示唔會搏盡
再睇埋侯城喺今屆英聯盃賽事，可以殺入8強堅有運，事關班波對上4圈賽事夾埋入得2粒，當中2次喺互射12碼階段淘汰對手，演出真係冇乜說服力。呢次對住實力高幾班嘅曼城，隨時現形畀人大數送出局都似。