豪門讓得辣唔係贏梗，特別係畀人打到謝謝哋嘅強隊，今日重心推介場次，係西甲伊巴主場硬撼皇家馬德里。「銀河艦隊」依家陷於低潮，不過操盤手未有認清形勢，仍用「慣性思維」開出皇馬要讓球半咁辣盤口，非常離譜，伊巴近8戰僅1敗，下盤及大盤均值得捧場。

（now 632周日晚11時直播）

當一隊波唔順嗰陣，好多問題就會即時浮面，皇馬喺上周國家打吡喺主場慘吞巴塞4蛋後，成個禮拜都充斥負面新聞，肥叔不嬲都唔理呢啲球隊消息，但你話對隊波冇影響就呃你。不過操盤手卻一於少理，繼續用「皇巴」（皇馬及巴塞）喺西甲打橫行嘅「慣性思維」開盤，今仗態沉嘅皇馬造訪聯賽「六哥」伊巴，竟然「慣性」讓球半咁辣，平時咁樣開盤已經過晒火位，如今「銀河艦隊」個勢咁曳，操盤手仍冇打算作出調整，就算肥叔點樣認盤唔認人，都唔信呢類盲目開盤，況且伊巴近8仗僅1敗表現唔錯，兼有地利絕對有力一戰，下盤兼大盤值得捧場。

阿特蘭大下盤大戶入定貨
意甲方面，羅馬主場對阿特蘭大，前者上周中於歐聯慘敗畀巴塞六個一皮，士氣低落。雖然阿特蘭大連續三場冇波入都唔好得幾多，但初盤羅馬仍要讓一球咁多，實在過分，除咗出面嘅博彩公司狂吹淡風之外，肥叔亦吼到大戶已入定啲阿特蘭大嘅下盤，不妨跟番多少。

（TVB 301周日晚10時直播）