今晚有5場挪超上演，當中排第3嘅華拉倫加主場迎戰排15位嘅波杜基林特。華拉倫加近兩場雖然贏唔到，但主要原因係對手實力唔差，今仗面對排尾二兼連輸3場嘅波杜基林特，相信有望大勝洗頹風，一於捧1.98倍嘅華拉倫加「讓球主勝」。
（周一凌晨2時開賽）
華拉倫加早前曾錄得一輪4連勝，但近兩仗都贏唔到，並非球隊跌Watt，而係呢兩場波嘅對手分別係已連贏多場嘅洛辛堡同實力分子莫迪，所以贏唔到情有可原。華拉倫加今仗雖有後衞基迪韋拿同中場史甸格爾累積滿黃牌停賽，而剛踢完美洲國家盃嘅牙買加射手迪桑布朗未知能否趕及上陣，但球隊仍有多名主力在陣，回師主場有望成功止跌。
波軍頹爆3連敗
波杜基林特今季表現未如理想，其中聯賽作客未贏過之餘，近三仗客戰竟失咗12球，平均每場畀對手入4粒，擺明唔識踢作客賽事。波杜基林特最近3場波都輸晒，狀態認真麻麻，今仗更有中場梳特尼斯累積滿黃牌停賽，加上作客相信都係「等炒格」，讓球主客和華拉倫加讓一球，當然捧「讓球主勝」。
