美職上演「紐約打吡」，紐約城主場對紐約紅牛，紐約城球星韋拿終於踢出身價波，近4場美職轟入4球，助球隊成績大躍進，取得聯賽3連勝，再遇同市對手紅牛當然要食住強勢，報番首循環一敗之仇。紐約紅牛近期演出走樣，近4次作客3敗，睇怕冇運行，2.45倍主勝咪走寶。

（周一凌晨4時30分開賽）

紐約城上月作客1比2輸畀紅牛之後，知恥近乎勇，近4場聯賽錄得3勝1和，「西班牙狂牛」韋拿獨取4球，包括上仗梅開二度贈FC多倫多兩蛋。呢位33歲老將今季登陸美職初期表現麻麻，頭12場聯賽只入兩球，好彩現已重拾射手本色，令到紐約城攻力大增，今場值得睇好。

反觀紅牛自上次贏完打吡戰後表現插水，聯賽一度錄得1和4負劣績，直至上仗1比0擊敗皇家鹽湖城先至止血。大家要留意鹽湖城當時有兩人被逐，紅牛先可勉強小勝，擺明仍未完全回勇，今場遇上來勢洶洶嘅紐約城，恐怕難逃一敗。