今日下午澳職獨腳戲，墨爾本城主場迎戰尾二嘅珀斯光輝。珀斯光輝唔單止連續四仗食白果，而且每逢作客就腳仔軟，連盃賽在內已經錄得4連敗，試問有乜能力搶分呢？相反主場「猛火」嘅墨城，有弗爆射手科拿路利壓陣，勢必趁機打落水狗，主W捧得過。

（有線64及203台周五下午4時40分直播）

珀斯光輝今季表現走晒樣，開咧6戰僅1勝排緊尾二，佢哋最大問題係攻力極度疲弱，齋計聯賽入得6球，與包尾嘅阿德萊德聯曳絕澳職，最近4仗更食白果1球都入唔到，愈踢愈沉。除此之外，光輝作客表現非常差勁，不但聯賽3仗客場輸晒，連同上月頭澳足盃決賽作客淨吞墨爾本勝利2蛋，光輝開咧後客場連輸4仗，加上中前場主力夏朗特、薩哥維治同奧斯布路仍抱恙在身，未必出得，難望今仗會有所反彈。

射手科拿路利弗到漏
查實對手墨爾本城走勢亦麻麻，近3仗勝和負各1，不過比起陷於入球荒嘅光輝，墨城於主場嘅士哥能力較有保證，包括盃賽在內，墨爾本城今季四場喺自己地頭出擊，合共轟入10球。尤其係陣中箭頭科拿路利弗到漏油，現時以5個入波，拍住墨爾本勝利前鋒貝利沙位列聯賽射手榜一哥，加埋中場阿倫穆爾嘅後上入楔，火力絕對唔嘢小，難怪墨城依家轟入13個士哥冠絕聯賽，撞正態沉嘅光輝，仲唔趁機踩多兩腳咩？主W乃不二之選，另不妨吼埋入球大。