紅軍開「波」搶韁追主主

愈戰愈勇嘅利物浦，今晚喺歐霸盃B組主場迎戰波爾多，只要砌低對手即可提早出線。家陣紅軍連曼城都唔怕，分組賽4戰未贏過嘅波爾多點會係佢哋手腳先，1.95倍「主主」要追。

（now670台周五凌晨4:05直播）

紅軍球員開始掌握新帥高普嘅快速搶逼戰術，上仗大數曼城已經顯露威力，呢次主場出戰肯定搶得仲癲，有望早段迫使對方犯錯。雖然中場菲臘比古天奴養傷，但箭頭賓迪基、史杜列治可候命，佢哋為博高普歡心實冇留手。加上紅軍13次主場鬥法國球隊贏10鋪咁堅，今仗再下一城唔難囉。

波爾多作客曳
至於對手波爾多今季作客成績堅信唔過，連續10場作客不勝，而且佢哋喺歐霸盃有心無力，分組賽4戰未嘗一勝，今仗仲有前鋒卡斯里停賽，呢鋪作客氣勢正盛嘅利物浦仲點爆得出吖！