呢組先至係「死亡之組」
本來被視為「死亡D組」打咗4輪形勢已經明朗，曼城同祖雲達斯差唔多穩奪出線權，反而B組形勢「死亡」味更濃，曼聯、燕豪芬、禾夫斯堡同榜尾嘅莫斯科中央陸軍前後只差3分，4隊都仲有出線機會，今輪戰果非常關鍵，稍有閃失隨時瓜得。紅魔鬼曼聯今晚喺主場迎戰燕豪芬（PSV），贏波即可提早出線，但現時傷兵滿營，攻力疲弱，燕豪芬又唔係「省油的燈」，預料兩軍上半場戰情會好膠着，2.28倍半場和博得過！

（有線61及201台周四凌晨3時45分直播）

迪比掛帥靠唔住
曼聯上場英超險勝屈福特2比1，賽前就有朗尼、安東尼馬迪爾、卡域克、費蘭尼、占士威爾遜、路爾斯華倫西亞及勞基梳爾因傷缺陣，比賽期間安達靴里拉又拉傷腿肌，中堅菲爾鍾斯亦受傷退下火線，今場唔使預佢兩個，而患上流感嘅隊長朗尼亦未知能否趕及上陣。「紅魔鬼」今季攻力甚曳，領隊尹戈爾嘅控球在腳踢法為人詬病，再加上依家大軍人腳不整，火力更加弱雞。

雖然話曼聯及時有獲解凍嘅迪比翻生入波，對屈福特先開紀錄，上輪「紅魔鬼」作客不敵燕豪芬佢亦都有波入，不過此子表現飄忽，唔係太靠得住，見到曼聯多位進攻球員缺陣，PSV仲唔重點防守迪比咩？其實「紅魔鬼」上場對屈福特贏得幾有運，去到臨完場階段先靠對方擺烏龍全取3分，就知曼聯攻力差成點。

燕豪芬唔輸為目標
PSV現以6分排喺組內第2位，僅因得球較多而力壓對賽成績一樣嘅禾夫斯堡，最後一輪分組賽就會喺主場對住莫斯科中央陸軍，即係話PSV今場贏到當然最好，但作客和波其實亦係唔錯嘅賽果，只要喺最後一戰主勝中央陸軍，再等禾夫斯堡同曼聯兩敗俱傷，咁PSV嘅出線機會仍然樂觀。

估計PSV今場會先穩守，曼聯難喺半場咬得入佢哋，加上「紅魔鬼」近6場有5場開出半場和，一於再追！