沿用主力博首名
「曼市雙雄」今晚歐聯分途出擊，已經篤定躋身16強嘅曼城將會造訪祖雲達斯。「藍月亮」仲要為D組首名而戰，加上阿古路傷愈之後即刻有貨交，撞正同樣傷兵滿營嘅「斑馬兵團」絕對唔輸蝕，受讓平半1.9倍下盤捧得過吖！（有線64及203、中央5台周四凌晨3:45直播）

曼城連續3屆突圍歐聯分組賽，呢支英超勁旅對上兩屆都喺16強止步，為咗之後條路好行啲，老虎蟹都要搶番個小組「一哥」。冇錯，佢哋依然有隊長高柏尼、中場拿斯尼、大衞施華同前鋒韋菲特邦尼倦勤，但正正係因為冇乜人使，領隊比歷連尼講明會沿用大部分主力落場，包括剛啱復出即喺利物浦身上射入靚絕勁射嘅阿古路，戰鬥力有一定保證。

祖雲達斯兵源不足
位列D組次席嘅祖雲達斯，今鋪贏波即鎖定出線資格，鬥心同動力一定夠，奈何一對中場羅拔圖佩雷拉同卡華禾艾沙姆續抖，左閘艾拉同攻擊中場靴蘭尼斯亦喺上仗意甲因傷退下火線，兵源不足未必搞得掂「藍月亮」，今仗唔似讓得起囉！