誓搶3分提早出線
今晚歐聯B組賽事，只要曼聯呢鋪贏波，即可宣布提早奪得16強席位，所以佢哋今晚喺自己個奧脫福主場迎戰燕豪芬，肯定冇留手誓要全搶3分。雖然家陣紅魔傷兵滿營，但要數多2粒都冇難度，2.2倍讓球主勝值得支持。
（有線61及201周四凌晨3:45直播）
先講吓B組形勢，曼聯家陣攞住7分排喺小組榜首位置，只要佢哋今仗擊敗燕豪芬即可殺入16強。皆因即使莫斯科中央陸軍贏出另一場B組比賽，但由於紅魔對賽成績佔優（1勝1和），換言之就算曼聯下仗全失3分，而中央陸軍又贏多場追至同分，出線16強嘅始終都係紅魔鬼，所以唔使懷疑曼聯今仗爭勝決心。
朗尼復出迪比回勇
冇錯，曼聯家陣正面臨傷兵潮，前鋒安東尼馬迪爾、中場費蘭尼、卡域克等人早已因傷缺陣，班波喺上仗迎戰屈福特後，再增添中場安達靴里拉同守將菲爾鍾斯2件傷兵，實力難免打折。好在上仗因病缺席嘅朗尼有望復出掛帥，加上盛傳將會喺聖誕期間收禮物、加薪一倍至5萬鎊周薪嘅連格同表現有起色嘅迪比攻堅，紅魔仲維持到一定火力，要贏2粒問題不大。
燕豪芬防線作客走樣
至於對手燕豪芬暫時同禾夫斯堡一樣同得6分，仍有望爭取出線資格，不過球隊防線作客例牌跌Watt嘅問題，勢成球隊今仗搶分致命傷。呢支應屆荷甲盟主最近7場作客賽事竟然全部保唔住清白身，合共失守14次，場均失2粒都咪話唔牙煙。連喺實力較弱嘅荷甲都守唔住，今次造訪奧脫福球場點算先？偏偏對手曼聯今季主場演出特醒，未輸過之餘仲要近7鋪主場出擊得1次失守，咁睇法怕且燕豪芬今仗都係凶多吉少。
