世仇對決一撻即著
今晚各大聯賽好波連場，但最矚目一戰，肯定係西班牙國家打吡──次席皇家馬德里主場火併「一哥」巴塞隆拿。「銀河艦隊」王牌C朗同加里夫巴利等上周唔使踢「太公波」，抖到夠留晒力去迎接今場世紀大戰，贏波即追到同分必搏甩髀；另一邊廂巴塞兩大神鋒「新比利」尼馬同蘇亞雷斯，腳風順到冇朋友，球王美斯好大機會趕及復出，火力大增，兩軍近年碰頭入局勁快一撻即着，之前4次交鋒3度開出半場大，不妨追多鋪。

（now 632周日凌晨1時15分直播）

C朗抖足 美斯復出
依家喺聯賽落後巴塞3分排「阿二」，好彩上周國際賽大部分係無關痛癢嘅熱身賽，「銀河艦隊」成功爭取到C朗、加里夫巴利、卻奧斯、莫迪歷等主力免役，唔使踢「太公波」避免舟車勞頓，抖足精神應付呢場國家打吡。皇馬主帥賓尼迪斯今季接手後，常因過於保守嘅戰術捱鬧，《馬卡報》賽前大爆C朗、沙治奧拉莫斯同馬些路全力游說「肥賓」，國家打吡不能縮住嚟踢冇晒「飛士」，「肥賓」亦接納佢哋意見，賽前記者會表明會藉主場之利搶攻爭勝，務求於積分榜追平巴塞。

雖然巴塞球王美斯自9月尾因傷休戰，但其「MSN」拍檔尼馬同蘇亞雷斯非常爭氣，除咗西盃對維拉奴雲斯被收起外，喺之前8仗巴塞攻入嘅21球中，兩人竟合共包辦咗18粒，數據堅挺，而尼馬就佔咗10球，狀態勇達巔峰。當然最大嘅喜訊就係美斯日前已跟隨巴塞B隊復操，其贊助商「三間牌」又為佢出新砵造勢，睇嚟美斯好大機會趕及復出，火力進一步提升。

近7對碰炮製27球
原來巴塞喺西甲史上曾85次造訪皇馬(皇馬先後以3個球場作主場)，夾埋轟入99球，其中有83粒喺依家嘅巴拿貝球場取得，即係話只要今仗有士哥，便可達百球大關，加上為保榜首位置，「地上最強」作客一樣照攻可也。「皇巴」每次交鋒都精彩到爆，例多波入，對上7次碰頭合共炮製27個士哥，而且兩軍往往一開波就入晒局，近4次對壘有3次於上半場製造兩球或以上，話咁易就開出半場大，今仗嘅半場大有2.1倍，真係有買趁早。