亞冠終極戰 羊城迎阿爾阿里
亞冠盃決賽次回合終極一戰，今晚喺廣州天河體育館舉行，中超盟主FC廣州（廣州恒大淘寶）主場對阿聯酋豪門阿爾阿里。兩隊首回合打和0比0，預料雙方今仗都唔敢輕舉妄動，以免犯錯冇仇報。恒大即使有地利，但多位國腳剛於周二踢完對香港嘅世盃外圍賽，疲於奔命，加上射手列卡度高拉特有傷上陣成疑，難以咬入對手，預料戰況拉鋸，首選入球細。

（now 672周六晚8時直播）

2013年亞冠王者恒大有9位球員屬中國國腳，撞正近期世盃外圍賽連場惡戰，加上恒大兼顧聯賽及亞冠盃雙線爭標，今仗已經係眾主力近一個月第7場比賽，包括兩次長途跋涉飛去西亞作戰，遊飛機河都遊到頭暈，難免有疲態。特別係中國隊剛於周二世盃外圍賽同香港打和，包括鄭智在內嘅多位恒大球員賽後畀內地傳媒及網民怒插，士氣同信心難免受打擊。

高拉特有傷 主隊攻力削
恒大陣中雖然有3位巴西好手列卡度高拉特、荷西保連奴及艾傑臣助陣，但列卡度高拉特首回合受傷，日前操練都缺席，睇嚟傷勢唔輕，即使今仗頂硬上亦會影響發揮。列卡度高拉特今屆亞冠盃轟入8球，高踞射手榜一哥，如果佢缺陣肯定大大削弱恒大入波能力。再者恒大亦要提防阿爾阿里拎到作客入球，相信唔敢壓得太前。

阿爾阿里作客唔敢冒進
阿爾阿里首次打入亞冠盃決賽，經驗輸蝕，加上作客應會以穩陣行先，靠由賓菲加來投嘅巴西前鋒洛迪高利馬打反擊。事實上阿爾阿里首回合主場出擊都佔唔到優勢，臨尾仲有後衞凱卡被逐今場要停賽。阿爾阿里想喺恒大身上入波並唔容易，今仗隨時1球定出王者。