史達寧倒戈必醒神
英超大戰，曼城主場激鬥利物浦，雙方今場均有球員倒戈，反骨仔史達寧掉轉槍頭砌紅軍，「拚命三郎」占士米拿倒戈藍月亮。「反骨寧」跳船跳得啱，曼城依家排緊榜首，相反利物浦換咗高普領軍，成績依然麻麻，「藍月亮」今場仲有阿古路同大衞施華兩大將傷愈復出，紅軍脆弱防線勢必頂唔住，科娜熱捧主勝！

（now 621周日凌晨1時30分直播）

史達寧成名於利物浦，但佢人紅即囂，同紅軍傾續約又不斷扭計，其經理人亦曾公開侮辱紅軍，激到利迷紮紮跳，最尾「反骨寧」如願以天價加盟曼城。利迷祝呢個反骨仔「你沒有好結果」，之但係佢喺曼城堅係「活得比你好」喎！英超官方球員數據顯示，上季呢個時候「反骨寧」代表紅軍上陣12次，踢咗1,003分鐘，入得3球，平均每球要用334分鐘取得，而今季效力曼城上陣11次，踢咗772分鐘就已經有4個入球，平均每個士哥只需要193分鐘，而佢喺敵方半場嘅傳球成功率亦高達8成，比起效力紅軍嗰陣嘅7成明顯有進步。

阿古路施華及時雨
「反骨寧」愈踢愈進步，亦助曼城高踞英超榜首，「藍月亮」今季主場6戰錄得5勝，加上過去6次主場對戰利物浦取得4勝，往績佔盡上風。況且紅軍即使守到「反骨寧」，曼城今場仲有更加猛料嘅阿古路同大衞施華回歸，加埋今夏轉會標王奇雲迪布尼，火力真係超強。

今場亦有利物浦嘅占士米拿同史杜列治倒戈，占士米拿係就係好使好用，可以勝任多個位置，不過佢技術同組織力都麻麻，係好搏命協防，不過攔截力又係麻麻，成日犯規搞到紅軍輸罰球，呢個「拚命三郎」今夏由曼城免費過檔紅軍，就知佢幾多料喇！

沙高缺陣防線脆弱
「史獨」賽前話自己狀態好好，準備好隨時上陣，不過科娜真係對呢個「玻璃人」冇乜期望，領隊高普都唔敢冒險今場大戰出佢喇，一陣又傷咁點算？紅軍今場最大鑊係中堅馬馬度沙高缺陣，睇怕洛夫雲同史卡迪爾呢pair蝦碌中堅組合都係畀曼城一班星級進攻球員玩殘。高普上任至今踢咗4場英超，戰績係1勝2和1負，紅軍今場好難爆冷囉！