列奧斯復出「攻蜂」齊哂腳
經過兩周國際賽休戰後德甲回歸，位列中游嘅漢堡主場迎戰聯賽榜二哥多蒙特，多蒙特實力明顯高出一截，加上前線主力馬高列奧斯傷愈復出，夥拍奧巴美揚同米希達利恩再組恐怖攻擊組合，贏面甚高，但一來客勝同讓球客勝賠率都太熱，二來多蒙特近年作客漢堡成績極差。黑柴預期今仗會係入球騷，寧捧中位數3/3.5球嘅1.95倍大盤。

（now 671、有線61及201台周六凌晨3時30分直播）

多蒙特休戰期前喺魯爾區打吡力挫死敵史浩克04，3線作戰錄得7連勝，狀態同士氣都處於沸點，而且前線着晒火，近6場正式賽事每仗最少都攻入對手3球，今仗仲有主力攻擊手馬高列奧斯傷愈復出，前線齊番人火力更恐怖，面對質態都次一皮嘅漢堡贏面確高，不過多蒙特近9次作客漢堡竟然錄得1勝2和6負劣績，可見呢個球場唔係咁利佢哋，客Ｗ同讓球客勝欠熱捧價值。

漢堡實力一般，教練拉巴迪亞自己知自己事，下令喺休戰期加操，今仗仲準備一開波就同勁敵駁火，不過佢哋後防實在太曳，隊長佐羅踢法急躁亦欠缺位置感，佢嘅中堅拍檔史柏希斯已經年屆35，仲要啱啱為國出征，代表波斯尼亞喺歐國盃附加賽火併愛爾蘭，經過兩回合奮戰下出局，舟車勞頓力疲心傷，球隊主力右閘戴克美亞又傷埋，即使前線拉蘇加同基哥列舒治近況好，都恐防前面入埋唔夠後面輸。

蜜蜂兵歎慢板吼埋20倍「主客」
今仗除大盤外，黑柴亦建議冷敲有20倍好分頭嘅半全場「主客」！漢堡喺拉巴迪亞帶領下士氣係好咗，而且往往一開波就殺對手一個措手不及，近兩場聯賽都能夠先開紀錄，可惜最終都埋唔到尾，畀漢諾威反勝同達斯泰特逼和；另一邊廂，「蜜蜂兵團」多蒙特歎慣慢板，今季3線作戰竟然試過8次先落後，但呢8場波只輸過一次，就係對班霸拜仁慕尼黑，當中共有半數比賽（4次）反勝對手，包括歐霸盃0比3落後下反勝奧特足球會，同德國盃先失一球下發力炒柏達邦7比1。今仗急先鋒遇上後勁王，「主客」有得諗。