羅賓復出 蝙蝠俠生晒
國際賽完咗無耐，球迷最鍾意嘅聯賽又再返嚟，今晚德甲周五場將會由名牌球隊多蒙特作客漢堡。唔講唔知，原來「蜜蜂軍團」踢周五場特別醒神，加上「羅賓」馬高列奧斯歸位，同最佳拍檔「蝙蝠俠」奧巴美揚合作攻堅，有力將連勝紀錄增加至8場，1.78倍讓球客勝唔好錯過。

（now671台、有線61及201周六凌晨3:30直播）

受到巴黎恐襲影響，加上德國早前鬥荷蘭嘅熱身賽亦宣告取消，令唔少球迷擔心今輪德甲安全問題。好在漢堡賽前表示，會同當地警方、多蒙特通力合作，確保每位球迷嘅人身安全，相信比賽可以順利舉行。

周五超強戰績17勝2和
講番兩隊近況，多蒙特上場贏出第147次魯爾區打吡戰後，球隊錄得7連勝，狀態Fit到漏。呢鋪提早喺周五出擊，就更啱佢哋胃口添。皆因「蜜蜂軍團」稱得上係周五場殺手，對上19次喺周五出戰德甲比賽，竟然取得驚人嘅17勝2和不敗佳績，唔到你唔服。

而且球隊賽前亦收到好消息，主力翼鋒馬高列奧斯同中場紐尼沙軒前日已經復操。至於喺上周四受傷，缺席世盃外圍賽首回合嘅射手奧巴美揚，亦趕及於周日復出踢次回合，仲協助加蓬晉級添，何況佢前日入選2015年BBC非洲足球先生大獎最後5強，心情靚爆下梗係要數胡賀一賀。

漢堡連仗領先埋唔到尾
相反漢堡士氣就曳得多，球隊近6戰僅得1勝之餘，對上2仗更同樣喺先開紀錄嘅情況下，分別被對手追平，甚至反勝失分，對軍心打擊甚大。雖然佢哋上季2鬥「蜜蜂軍團」均保持不敗，不過主帥拉巴迪亞承認對手上季跌watt全因傷兵太多累事，既然呢次多蒙特可以全力出擊，睇怕漢堡今晚幾難頂得住。