經典對決絕冇悶場
今晚歐洲熱身賽上演「宿敵對決」，德國主場迎戰荷蘭。經過巴黎恐襲事件後，呢場波曾經考慮改期或取消，但最終都決定如期喺德國漢諾威HDI球場舉行，兩軍今次只係輕裝上陣，但正如德國領隊勒夫所講，德荷對決永遠都係經典，即使雙方派出唔少副選球員，預期都會係一場開放賽事，投注首選大盤。
（無綫翡翠台及TVB 13周三凌晨3時45分直播）
德國自贏得世界盃後表現同成績都唔理想，踏入今年踢熱身賽更1和2負未贏過，啱啱喺巴黎襲陰霾下投鼠忌器，淨吞法國兩蛋，球隊賽後仲要喺更衣室過夜，甚至離開機場時都唔敢搭德國專屬大巴，全程相當狼狽。不過德國足總副主席Rauball聲稱，球隊唔會畀恐怖主義嚇倒，德國總理默克爾亦話會入場觀戰支持。
副選上場更加搏命
德國今仗陣容不整，對法國嘅6名主力包括紐亞，謝路美保定，祖拿斯赫達，舒韋恩史迪加，普多斯基同新星利萊辛尼都得到免役，不過勒夫話每次德荷對決必定係經典，上仗對法國未有上陣嘅舒賀爾尼同麥斯古斯等副選有機會落場，戰意甚至比正選球員更好。
「橙衣兵團」荷蘭啱啱喺熱身賽作客以3比2擊敗威爾斯，球隊未能進身歐國盃決賽周，近期踢法明顯主動開放，希望以更多入球撫慰失望嘅球迷，雖然主力攻擊手洛賓今仗輪休，但對威爾斯未有上陣嘅迪比同亨特拉爾都儲足火，今場面對宿敵德國唔會退縮，預期入波唔會少。
