兩支打入歐國盃決賽周嘅球隊波蘭同捷克今晚深夜「拍跳」。主隊波蘭王牌羅拔利雲度夫斯基今仗唔會上陣，但一眾二線球員勢必趁機博上位，遇上近期踢法主動嘅捷克，阿謙今場一於捧大盤。

（TVB 302周三凌晨3時45分直播）

波蘭近4仗取得3勝1和唔錯成績，但呢班波入得又失得，已經連續5場開出大盤，波蘭主帥拿華卡喺上周五贏完冰島後，批准羅拔利雲度夫斯基及門將法比安斯基等幾位主力提早離隊，今場或會改派班二線兵試陣，但其他球員好似比薛斯基、蘇拜治同米利克同樣有質素，有得出場應該更加搏命。

捷克近期狀態亦唔錯，近5仗贏咗4場，而且呢4場勝仗至少攻入對手兩球。捷克今仗雖有後衞謝比施拿斯同前鋒馬迪維達缺陣，但門將施治、中場柏拉斯同前鋒尼斯特等主力皆在陣中，球隊攻擊點甚多，對住波蘭唔會刻意求守，阿謙估計呢場波隨時上演入球騷。

馬其頓殘陣難讓黎巴嫩
同日較早時間進行嘅另一場熱身賽，由馬其頓主場對黎巴嫩。馬其頓中場艾迪美因藥檢問題停賽，加上多位主力因傷缺陣，面對有中超杭州綠城中場安達領軍嘅黎巴嫩未必咁易贏到，一於捧讓球客勝。

（TVB 302周二晚8時直播）