主場齊腳兼握作客入球
今晚續有歐國外附加賽次回合，愛爾蘭返主場迎戰波斯尼亞。「綠衣軍團」上仗作客賽和對手，最重要係揸住1個作客入球喺手，搞到波斯尼亞今場要焗攻，愛爾蘭今仗仲有約拿芬禾達斯同奧沙刑滿復出，絕對唔赦逢附加賽就腳軟嘅波軍，小讓平半值得捧場。（有線61、64、201及203台周二凌晨3時45分直播）

首回合愛爾蘭作客波斯尼亞於大霧環境下進行，佢哋亦成功「博大霧」，靠羅比巴迪嘅入波先開紀錄，雖然3分鐘後就畀迪斯高扳平，但最終保持和局兼取得1個重要作客入球，今仗只要唔失波，就至少可憑較多作客入球出線，形勢唔錯。「綠衣軍團」冇乜嘢叻，最叻係死守，今仗中堅奧沙坐完波監復出，另一刑滿復出嘅前鋒約拿芬禾達斯出晒名係「拚命三郎」，經常回防助守，相信兩人可進一步鞏固防線。有傳上月對德國一箭定江山、養傷咗一輪嘅修咸頓前鋒沙恩朗，今仗都有機候命，加埋老將羅比堅尼上仗冇出場養精蓄銳，愛爾蘭今仗可謂大把籌碼喺手。

波斯尼亞焗攻易輸反擊
波斯尼亞個別人腳其實唔差，好似迪斯高、比真歷、比錫及比高域等有一定卡士，但踢波係講整體，佢哋踢法太過倚賴迪斯高數胡，一旦呢位羅馬前鋒被嘜死，前線就陷於癱瘓。由於形勢上佢哋一定要入到波先有價講，勢必豁出去進攻，反而啱晒愛爾蘭打反擊。況且波斯尼亞自1995年起獨立參賽，只曾殺入過上年世界盃決賽周，從未喺附加賽威過，上屆就畀葡萄牙以6比2屠殺，連同10年喺世盃附加賽出局，猶如未解魔咒。愛爾蘭面對焗攻嘅波斯尼亞，唔使心急睇定嚟食，絕對係坐和望贏格局，愛軍小讓平半仲有兩倍分頭，值博率高，呢個上盤咪錯過。