另一場歐國盃附加賽，將會上演復仇戰。烏克蘭對上嗰次喺2000年歐國盃附加賽，就係輸畀斯洛文尼亞2:3出局。呢次仇人見面，烏克蘭梗係想報番一箭之仇啦，今晚佢哋首回合主場迎擊斯洛文尼亞，肯定先發制人務求取得領先優勢，就算讓半一都照撐1.8倍上盤。（有線61、64、201及203、中央5台周日凌晨1:00）

烏軍近4場 歐國外主場3勝
烏克蘭過去5次參戰附加賽，雖則全部鎩羽而歸，不過球員至少比對手更加習慣應付呢種壓力。難得今仗重遇昔日仇人，成班球員落到場仲唔加倍搏命咩！呢班波對上4場歐國外主場贏3場，即使中場史提賓恩高今仗坐波監，仍然值得秤先。

雖然話斯洛文尼亞連續4次對烏克蘭不敗，但雙方最近1次交手已經要追溯至1999年，冇乜參考價值。睇番佢哋條鋒線最有經驗嘅球員，只係效力日職嘅路華高域同隆比真歷，怕且未夠班攻破主要由薩克達球員組成嘅烏軍防線，何況斯洛文尼亞近10場作客輸咗8場，作客擺明會腳軟，呢鋪仲點搶分先？