主場謝幕贏波即升班
日乙仲剩兩輪，榜首嘅大宮松鼠今日主場最後一擊，只要打低護級分子大分三神，就可以確定來季升上日職，話唔定同日磐田山葉失分，大宮更加可以提前封王添！主隊讓半一嘅2.01倍上盤抵博。
（開賽時間：周六下午3:00）
原本有成10幾分優勢嘅大宮，自中後段起hea咗一排之後，到家陣只係Head住磐田2分，假如响今季最後一場主場波都唔去盡贏波，莫講話可能畀磐田過頭，衰起上嚟仲會畀第3嘅福岡黃蜂追近，冠軍冇埋唔在講，直升日職嘅席位都可能冇埋，所以監督涉谷洋樹响賽前最後一課公開操練，就講到明要响擁躉面前贏波，順利取得日職入場券，叫班人醒醒定定。
加藤順大任宣傳大使
其實外界都幾睇好大宮開得到個Ｗ，事關佢哋有主場之利，首循環又試過作客數大分3蛋，況且對手件巴西前鋒艾雲度施華仲坐埋波監添！理論上大宮實食冇黐牙！連上尾市政府都趁勢宣布，任命咗大宮門將加藤順大做「上尾市宣傳大使」，同小提琴家長尾春花、觀世流能樂師梅若泰志一齊宣傳呢個埼玉縣中東部城市，佢哋睇中只係住過响上尾市9年嘅加藤，好明顯就係覺得大宮今季會升班甚至攞埋冠軍，人氣一定旺盛，有助宣傳佢哋個城市。
但係大宮係咪有本事炒起尾二嘅大分三神呢？老實講唔容易，大分目前落後尾三嘅FC岐阜5分，要兩連勝至有機會翻生，唔使踢護級附加賽，根本唔可能會放軟手腳保送大宮上日職，而且前鋒三平和司、中場兵働昭弘幾個，近幾年都有打附加賽呢類關鍵大戰嘅經驗，完全唔會赦大宮，肯定會同主隊鍊到盡，大宮贏都可能好吃力，甚至搏拳搏出個2.07倍入球大添，講穩陣都係玩個大宮上盤好啲。
