勝利船欺善怕惡
日本天皇盃嚟到16強階段，今日阿謙就睇中神戶勝利船主場對橫濱水手嘅賽事。勝利船主場雖已連贏3場，但擊敗嘅對手都係下游同日乙球隊，今仗面對「硬嘢」橫濱水手遇上真正考驗，加上勝利船近3次主場對水手都贏唔到，阿謙睇好水手可反客為主，客軍小讓平半捧上盤。

（周六下午2時30分開賽）

勝利船近4仗取得3勝1負，狀態睇落唔錯，但要留意呢3場勝仗嘅對手松本山雅、山形山神同千葉市原呢啲弱旅，而唯一敗仗正正係作客對今仗嘅對手水手；再加上勝利船之前對前列分子鹿島鹿角都連輸3場，可以睇到呢班波「欺善怕惡」。

勝利船前鋒柏度祖尼亞雖已傷愈，仲喺日前嘅聯賽後備上陣取得入球，但今仗仍有鋒將馬昆奴斯、李安度蒙迪拉及中場三原雅俊因傷上陣成疑，球隊整體實力始終不及水手，今仗縱有主場之利都信唔過。

客隊讓波未驚過
水手日前喺聯賽輸咗畀鹿角，結束近期不敗走勢，未能以勝利慶祝隊長中村俊輔獲選為日職10月份最佳球員。不過水手喺日職次階段嘅表現始終畀到球迷信心，今仗雖有中場喜田拓也未能克服傷患需要缺陣，而前鋒拉芬夏、中場中町公祐及後備門將田口潤一亦因傷上陣成疑，但球隊仍有唔少主將在陣，艾迪美臣巴拉加同齋藤學次階段夾埋入左10球；加上水手近3次造訪勝利船都未輸過，絕對有力終止對手3連勝，水手小讓平半，阿謙推介上盤。