明早美洲國家盃4強大戰東道主智利火併秘魯，智利上仗因干沙路查拉出陰招搞到卡雲尼被逐而淘汰烏拉圭，引發軒然大波，好彩王牌阿歷斯山齊士傷勢無礙可披甲，喜遇最近10次對陣輸足9場嘅「私房菜」秘魯，梗係想清脆利落咁贏番場，重振聲威殺入決賽，讓球盤讓一球都冇有怕，強捧1.83倍智利上盤。(now 681周二早上7時30分直播)

A山拍維達爾 攻力保證
智利今屆一直表現對辦，表現好評如潮，點知上仗對住烏拉圭，中堅干沙路查拉玩「獨龍鑽」辣着對方前鋒卡雲尼，搞到後者被逐而最終險勝一粒。咁都未算，智利足總仲反咬一口，向南美足協對卡雲尼、高甸等7名烏拉圭球員提出控告，指佢哋上仗曾攻擊及侮辱球證同智利球員，有指此舉可能係向南美足協施壓，係為咗查拉喺餘下賽事唔使接受停賽處分。

查實智利眾將自尊心好重，唔想球迷以為佢哋要出埋呢啲那渣招贏波，最好嘅方法就係今仗對秘魯清脆利落咁贏番場。上仗末段有啲傷嘅王牌阿歷斯山齊士（A山），已經證實冇乜大礙，有鬥心極強嘅A山在陣，加埋入咗3球嘅維達爾全力搶士哥爭金靴，智利4仗轟11粒嘅強大火力繼續有保證。

秘魯係私房菜 惡唔出樣
另一邊廂，秘魯有中場孖寶波爾隆同盧巴頓刑滿復出，上屆金靴獎得主荷西古里路一係唔發市，上仗對玻利維亞一入就省三粒，絕對係秘魯嘅取分之鑰。不過，佢哋可能未踢先怯，點解嘅？因為之前10次正面交鋒，竟然輸咗9次，擺明係格食格畀智利食住，而且志切捧盃嘅智利上仗贏得咁肉酸，誓要重振聲威，今仗必定揸晒筷子搶食「私房菜」秘魯，相信可輕取對手殺入決賽。但主W得1.35倍冇肉食，但讓球盤智利只係讓一球，斯維認為今場係坐走望贏格局，不妨捧更知味嘅1.83倍上盤。