鬥牛撼三獅啞火捱細界
一般國際賽期，球迷都大呻冇嘢好睇。又啱嘅！講刺激唔夠聯賽刺激，又鮮有勁旅碰頭，好難怪球迷唔睇！不過今夜深宵就唔同，高手過招場合多到唔知揀邊場嚟睇，歐洲國家盃外圍賽已經打完，各隊列強如德國、西班牙、法國、英格蘭等齊齊喺今輪超級熱身賽Show off，一邊閱兵，一邊窺探對手實力，總有一場啱你睇！

鬥牛撼三獅啞火捱細界
歐洲名牌勁旅西班牙同英格蘭原來過去五次交手都係熱身賽，已經好耐冇喺大賽決賽周碰頭。今晚，「狂牛」會喺主場恭候「三獅」，呢場「太公波」賽前兩軍均有多位常規國腳因傷退隊，雙方皆陣容不整，加上近四次對戰全開細盤，今場不妨再追入球細。

（now 632及TVB 13周六凌晨3時45分直播）

今場賽前西班牙再有皇家馬德里中場艾斯高操練期間拉傷肌肉，要退出國家隊，成為繼沙治奧拉莫斯同桑法蘭托里斯後，第三個受傷退隊嘅「狂牛國腳」，而一早因傷未有入選大軍名單嘅仲有中場主力大衞施華。

另外「狂牛」領隊迪保斯基今次重選迪亞高哥斯達入伍，仲話佢對球隊非常重要，唔係啩？「迪哥」喺英超經常畀人鬧無品，加上今季狀態低迷，入球數字大減，各項球會賽事加埋只係入得三粒，間接連累車路士成績直線下滑。嚟到國家隊雖然有恩尼斯達、桑馬達、佐治高基等高質中場支援，之不過衝得撞得嘅迪亞高哥斯達同「鬥牛軍團」tiki taka踢法格格不入，呢個就係「迪哥」為西班牙上陣九次，僅射入一球嘅原因，西班牙今鋪靠佢點會有運行呀！

英軍殘陣 朗尼靠唔住
英格蘭喺外圍賽十戰全勝強勢殺入下年歐國盃決賽周，不過「三獅軍團」慣例對住強隊就現形，呢隊波要佢哋防守都還可以，要攻就咪搞；隊長朗尼變身隱形人，莫講話仲未搵番對射門鞋，查實連組織攻勢都唔掂「零貢獻」。哈利卡尼、史達寧、巴克里等進攻球員亦略嫌幼嫩靠唔住，而史杜列治、韋碧克、韋舒亞、阿歷士張伯倫等常規國腳又養緊傷，英軍今場未能排出最佳陣容迎戰，睇嚟都係試兵為主，唔慌多波入，再加上英軍最近四次對西班牙皆開細盤，其中三場總入球更只係得一球，今場捧入球細掂呀！