日本挽飛士猛炸獅城

主場被悶和嬲到依家
世界盃外圍賽亞洲區E組賽事，新加坡主場迎戰同組最強嘅日本。「獅城兵」作客曾成功守和日本0比0，但回師主場未必再咁易踢，皆因日本喺之後外圍賽出強陣下錄得3連勝，今仗為挽面子隨時殺個片甲不留，讓球主客和日本讓三球阿King照捧讓球客勝。

（周四晚上7時15分開賽）

新加坡上次作客日本表現出色，當中25歲門將馬布特全場作出18次撲救，最終喺將士用命下成功守和對手搶到1分。「獅城兵」最近兩場世盃外雖然都贏波，但對手只係阿富汗同柬埔寨，實力難與日本相提並論，加上「東瀛武士」主場畀你守和咁失威，今仗必定狂轟猛炸，相信新加坡凶多吉少。

海外兵擔正3連勝
日本今屆世盃外4戰取得3勝1和，和波一仗正正係主場和咗新加坡，賽後被媒體狠批恥辱。佢哋其後痛定思痛，最近3仗強陣出擊下取得連勝兼攻入12球，回復勁旅本色。「東瀛武士」今仗繼續以香川真司、本田圭佑同岡崎慎司3位海外兵掛帥，加上人氣新星武藤嘉紀，有望輕取新加坡雪恥，阿King推介讓球客勝。

另一場葡萄牙U21主場對阿爾巴尼亞U21嘅歐國盃外圍賽，葡萄牙陣中有多名球員喺西甲搵食，實力明顯比對手強，加上近兩次對賽皆大勝，讓球主客和讓兩球直取讓球主勝。（有線155台周五凌晨1時15分直播）最後一場就係馬其頓主場對黑山嘅熱身賽，馬其頓艾迪美因藥檢問題要繼續停賽，球隊近5仗入得1球攻力疲弱；黑山踢熱身賽戰意亦成疑，一於揀半場和。

（周五凌晨1時開賽）