今晚係英格蘭聯賽錦標天下，第3圈比賽會上演「前英超球隊」對決，由英甲孖寶韋根主場迎戰黑池。黑池近3次作客全敗，加上班波備受降班危機威脅，呢鋪作客韋根，怕且幾難惡出樣，1.46倍主勝放心捧場。

（開賽時間：周三凌晨3:15）

黑池專心護級唔貪盃
韋根喺12/13球季雖然拎到足總盃冠軍，但從此就同英超講拜拜，上季佢哋聯同早兩年降落英冠嘅黑池護級失敗，今季一齊跌落英甲比賽。好在韋根並冇進一步沉淪，暫時排喺第5位，同榜首華素爾僅差5分，都仲有機會重返英冠。再者，韋根今季主場戰績可人，近7戰取得5勝2和佳績，呢次對住作客3連敗嘅黑池梗係值得睇高一線。

另邊廂嘅黑池就繼續頹落去，呢班波即使嚟到英甲都係冇起色。家陣佢哋喺聯賽榜排第20，只係高過包尾大幡克魯3分，隨時出事再降一級，咁嘅環境仲邊得閒分心盃賽吖？況且今仗係黑池12日內第4場作客賽事，成班波都唔知回唔回得切氣，身心俱疲下就更難爆得出。