今日多場英錦標賽事，阿King不厭其煩講多次，英錦標唔似得英足盃同英聯盃咁巴閉，只係畀英甲同英乙球隊多隻盃玩吓，不過今晚有場對碰相信大家唔會陌生，就係韋根主場對黑池嘞！兩軍早幾年都踢過英超，不過今季齊齊淪落到踢英甲，韋根就爭氣啲，依家喺聯賽排第5，力爭升班資格，排緊20位嘅黑池就勁差，再頹落去下季隨時英乙見！韋根上場英足盃留晒力，今場主勝捧得過！

（周三凌晨3時15分開賽）

韋根上場英足盃畀同級對手貝利大炒4蛋，10場不敗紀錄斷纜，賽後領隊卡達維為大敗感到羞恥，更向球迷道歉。其實卡帥呢次係留力留出禍，收起門將積亞基連倫、中場麥斯包華、米高積及斯、前鋒韋迪舒特等主力，搞到半場已經輸3粒，想收復失地為時已晚。吸取教訓，卡帥今仗唔敢再留力，誓要喺主場球迷面前贏得好好睇睇。黑池近3場作客全敗，梗係捧主勝！

錫菲聯羅奇代爾串燒
另一場英錦標推介費列活特主場迎戰錫菲聯，主隊太倚賴前鋒占美樸達數胡，但呢位前鋒近4仗只入一球，搞到球隊死晒火，相反錫菲聯上仗特登收起射手比利沙柏，今場有力反客為主，捧客勝。最後羅奇代爾主場對戰乙組仔摩甘比，羅奇代爾日前憑前鋒拿恩治大演帽子戲法，於足總盃贏波晉級，兼且打破四連和嘅悶局，食住個勢再炒摩甘比唔難，讓球主勝值捧。