沙特4戰省15粒
嚟緊又輪到國際賽檔期，今晚打頭陣嘅有亞洲區世盃外圍賽第2圈比賽，由A組巴勒斯坦主場迎戰沙特阿拉伯。巴勒斯坦為咗保住出線機會，今仗未必甘心死守博1分，呢次遇着對方主力射手艾爾沙拉維狀態大勇，有望踢出火花，1.82倍入球大穩陣。

（開賽時間：周一晚上10:00）

巴勒斯坦目前落後次席阿聯酋2分，以5分排喺A組第3位，如果佢哋唔想進一步被拋甩，放棄成為4支最佳次名球隊之一出線，佢哋的確冇乜失分空間，今場點都要搏。既然呢班波喺首循環作客情況下，都可以2度攻破沙特大門，呢次回師約旦中立場睇怕都唔會食白果。

巴勒斯坦爭最佳次名
至於沙特阿拉伯排得榜首唔係冇理由，強大火力成為佢哋搶分最大武器。沙特喺A組4戰全勝兼轟入15球，當中主力射手艾爾沙拉維腳風勁順，連續4仗均有份建功，個人獨取8粒，真係勒都勒唔住。翻查紀錄，呢位前鋒喺首循環鬥巴軍射入2粒，證明佢非常了解對手弱點所在，相信今晚都唔會令大盤客失望。