史特加守「細」波抗拜仁

拜仁喺德甲打遍無敵手，上仗又喺歐聯大數阿仙奴5:1，呢次回師主場迎戰史特加，好自然再被睇高一線。雖然史特加多年嚟對住拜仁冇啖好食，偏偏佢哋冇咁易畀對方炒鑊甘，既然今仗入球中位數升至3.5球，不妨冷敲2.13倍入球細。

（now672台、有線61及201周六晚10:30直播）

哥迪奧拿或收起主力
平心而論，想史特加喺拜仁身上搶分真係唔使諗，皆因佢哋連續10次同拜仁交手全部輸晒。但值得留意嘅係，史特加偏偏好少大敗而回，呢10場敗仗只係試過1次以超過2球差距輸畀拜仁。若然只計對住哥迪奧拿執教拜仁後就仲威，班波4次未試過失守多過2次，證明史特加係有能力應付拜仁強大火力。以佢哋近4戰贏3場嘅上佳狀態嚟睇，史特加今仗有力將失球數字減至最低。

何況今仗係拜仁1個月內第7仗比賽，主帥哥迪奧拿或者收起部分主力，免得佢哋搏到殘。預期傷愈復出無耐嘅翼鋒洛賓、中堅貝拿迪亞有望擔正，相信佢哋都要時間搵番比賽狀態同節奏，未必可以咁輕易大數對手。