1周3戰唔夠人用
德甲今晚爆發獨腳戲，由漢諾威主場鬥哈化柏林。雙方最近1周3戰踢到殘，漢諾威主帥芬錫克開到聲話唔夠人使，對家哈化柏林更大鬧前鋒荒，今鋪實唔會貿然搶攻，加上兩軍近年交手都冇乜波入，今仗敲1.7倍細最穩陣。

（now670、有線61及201周六凌晨3:30直播）

由於周中有德國盃次圈賽事踢，唔少球隊都要喺7、8日內踢3場波，你話拜仁、多蒙特就冇問題，漢諾威同哈化柏林呢啲中型班，邊有咁雄厚嘅兵源吖，體力削弱在所難免。漢諾威主帥芬錫克就話，已經要求會方喺明年1月開水喉畀佢增兵，球會最近亦搵咗曾經發掘丹巴巴亞同清武弘嗣嘅前紐倫堡首席球探莫基返嚟，準備喺下半季大展拳腳。不過，遠水不能救近火，呢期漢諾威都要繼續捱。

哈化柏林冇搶攻本錢
對家哈化柏林都唔好得幾多，最近喺德盃同聯賽戰線連環失利，最弊係上輪聯賽輸畀慕遜加柏場波，陣中前鋒沙洛文卡勞近距離食咗個波餅，賽後證實腦震盪，直至禮拜三都仲未練到波，要知道射手伊比斯域仲停緊賽，舒希巴同艾拉基就打咗柴，剩番個唔知出唔出得嘅沙洛文卡勞1件正印前鋒，斷估哈化都冇乜本錢搶攻。再睇埋往績，雙方近5次交手有4次開細，今鋪睇怕都係入球細居多。