阿仙奴擺鐵桶搶仁分
今晚歐聯成為倫敦雙雄救命波，阿仙奴上輪幾經辛苦贏波，走出頭兩場輸波陰霾，主帥雲格能否保住連續16屆帶隊躋身16強嘅金漆招牌，今仗造訪拜仁非常關鍵；其倫敦死敵車路士成績頹到爆，屢傳領隊莫連奴「大限將至」，究竟今仗主場迎戰基輔，係「寸王」嘅續命丹？定係催命符呢？

歐聯F組爆發重頭大戰，氣勢如虹嘅阿仙奴今次要作客鬥拜仁慕尼黑。雖然阿仙奴上輪喺主場擊敗拜仁重現曙光，但如果今仗輸波的話，就會令出線形勢陷於極度被動；賽前主帥雲格講明和波收貨，遇上鍾意「歎慢板教練」哥迪奧拿領軍嘅拜仁，阿仙奴決心死守有力全身而退，受讓必揀讓球客勝。

（有線61及201台周四凌晨3時45分直播）

唔輸有價講 受讓博得過
頭兩輪輸晒嘅阿仙奴，上仗主場對拜仁踢出代表作，改打穩守突擊偷襲得手，贏2比0重燃出線生機，證明呢支「技術流」就算放棄控球，專心防守一樣頂得住「外星仁」。賽前主帥雲格強調今仗造訪拜仁，和波攞1分亦可接受，點解呢位之前15屆帶隊殺入16強嘅名帥忽然扮矮仔呢？因為若果阿仙奴今仗輸波就手尾長，假設另邊廂奧林比亞高斯再贏薩格勒布戴拿模的話，拜仁與奧林比亞高斯便同得9分，拋離阿仙奴與薩格勒布戴拿模6分，就算阿仙奴下仗戰勝薩格勒布戴拿模，只要同時間拜仁主場賽和奧林比亞高斯，後兩者便齊齊領先阿仙奴4分，提早一輪攜手出線，為免令出線形勢陷於極度被動，阿仙奴今仗起碼要保不敗。

兵工廠傷兵一大籮
阿仙奴近6仗贏咗5場，氣勢如虹，但不妨睇吓佢哋嗰張傷兵名單，有禾確特、阿歷士張伯倫、艾朗藍斯、阿迪達、韋舒亞、韋碧克、路斯基……真係水蛇春咁長，前三者上次對拜仁都有份披甲，尤其係「禾仔」乃打快速反擊嘅重要棋子，冇咗呢把尖刀喺前線快放，加上作客不利，阿仙奴把心一橫擺鐵桶陣唔出奇。

拜仁喺德甲一向打橫行，但啱啱被中游分子法蘭克福悶和0比0，聯賽開咧10連勝紀錄終告斷纜，似乎有啲跌Watt。歐聯各隊實力接近，但拜仁主帥哥迪奧拿仍然要求「絕對控制」，近兩季畀哥帥嘅「磨功」訓練下，拜仁比賽初段常漫無目的互傳，撞正硬淨球隊，經常老鼠拉龜冇碇埋手。上輪作客阿仙奴，着晒火嘅前鋒羅拔利雲度夫斯基都屢失良機，今仗兵工廠縮得更後，「羅拔仔」更難搵到食，斯維認為阿仙奴至少能頂住唔輸，讓球客勝咪錯過。