哈利卡尼歸位 Fans安慰
哈利卡尼歸位！呢位去季入波當食菜嘅熱刺射手，經歷季初一輪低潮之後，最近終於重拾射門鞋，喺上輪聯賽大演帽子戲法，由基斯甸艾歷臣同拉美拿餵波，相信哈利卡尼「士哥」肯定陸續有嚟，今晚英超獨腳戲對住群龍無首兼輸到懵嘅阿士東維拉，隨時又係一場大屠殺，捧1.98倍「讓球主勝」啱數。

（now621台周二凌晨4:00直播）

自從開鑼戰輸畀曼聯之後，熱刺至今喺英超一直未輸過，如果唔係季初和波太多，家陣排名肯定進佔前列，不過最令領隊普捷天奴同一眾「熱刺躉」安慰嘅，一定係哈利卡尼重拾射手本色。呢位「三獅」國腳上仗鬥般尼茅夫連中三元，信心返晒嚟，即使孫興民未傷愈，由佢夥拍又係狀態大勇嘅基斯甸艾歷臣、拉美拿衝鋒陷陣，火力一定有保證。

普捷天奴賽前仲收到個好消息，養傷6個禮拜嘅中場賴恩美臣已經傷愈，今仗可以候命，有佢同迪利阿里、艾歷迪亞兩位活力型中場喺度，無疑大大減輕後防壓力。咪忘記熱刺新季10輪英超只係失咗8球，呢支倫敦球隊家陣絕對係有前又有後。

維拉冇人邊個教都瓜
對家阿士東維拉聯賽6連敗，會方喺上星期炒咗舒活，仲放晒風話要請前里昂主帥加迪掌舵，不過加迪左右手真尼斯奧及巴迪基利仍然同里昂有合約在身，所以未必咁快可以嚟救亡，意味住奇雲麥當奴會繼續擔任看守領隊。查實家陣邊個掌舵都惡搞，賓迪基離隊後，會方根本冇引入具級數球星，睇見首席射手係嚟自布力般流浪嘅基斯泰迪，後防仲要靠33歲嘅尼史葛擔大旗，就知維拉係幾唔掂，相信隊波仲有排輸。