大Sam新帥效應餘勢未了
今晚英超頭場愛華頓主場鬥新特蘭，「黑貓」新特蘭早前請來「大Sam」艾拿戴斯執教後，新帥效應立竿見影，上仗「東北打吡」更大炒死敵紐卡素3比0，大大振奮士氣，或會成為谷底反彈嘅轉捩點。反觀，愛華頓經過「地獄賽程」折磨，球員踢到腳軟，加上傷兵問題嚴重，今仗讓唔起「黑貓」，捧新特蘭讓球客勝。

（now 621周日晚9時30分直播）

東北打吡炒紐省招牌
新特蘭10月初炒咗艾禾卡特之後，不惜聘請曾教過死對頭紐卡素嘅艾拿戴斯領軍，足見會方改革決心非常大。「大Sam」亦不負所託，上一周帶隊漂亮勝出「東北打吡」，不但為球隊注下一支強心針，亦為自己省靚招牌，並迅速鞏固其治軍威信，佢有料到，球員自然對佢心悅誠服，聽晒佢話，加強球隊團結性。

事實上，新特蘭本身人腳唔錯，如史提芬費查、阿當莊臣、奧沙都係有質素嘅猛將，只要重拾信心，表現應會愈來愈好。今仗自然想食住個新帥效應個餘勢爭取連勝，進一步紓緩護級壓力。

愛華頓傷疲交煎
愛華頓近期惡戰連場，過去3場聯賽，分別硬撼利物浦、曼聯、阿仙奴，結果3戰只攞到1分，表現絕對唔合格。上周中英聯盃對諾域治，激戰120分鐘打和1比1，最終僅靠互射12碼勝出晉級，雖然出線但代價係消耗大量體力，匆匆再戰恐怕回唔切氣。更何況愛華頓目前受到傷兵問題困擾，特別係防線上嘅菲臘積基爾卡、希拔、巴尼斯都缺陣，後防存在唔少隱憂，今仗隨時輸埋都唔奇，事實上愛華頓雖有主場之利但根本冇讓波本錢，所以新特蘭讓球客勝非常值博。