爭做二哥直衝日職
日乙仲剩4輪賽事，大宮松鼠雖然遲遲唔肯發力衝線提前捧盃，但係冠軍已經九成係佢哋嘅囊中物，所以真係有心搏命嘅，恐怕就得「老三」福岡黃蜂，因為佢哋只落後「二哥」磐田山葉2分，仲有希望直升日職，今日福岡主場對FC橫濱，小勝完全冇難度，1.75倍主Ｗ抵玩。

家陣日乙榜首形勢冇變，近排連環跪低嘅大宮，依然領先磐田4分，贏多兩場都已經夠攞冠軍，於是日乙依家嘅焦點，落咗喺福岡可唔可以趕過磐田升上第2，唔使踢附加賽升上日職。

13次贏1:0博埋「讓球和」
由追唔追得到呢個point去講，福岡應該係好有誠意爭取直升嘅，事關前日佢哋宣布，11月14號主場壓軸戰對愛媛場波，會由KBC九州朝日放送直播，福岡今季主場波直播唔多，咁耐以嚟得6次，但係嚟到季尾情況變晒，佢哋提早公開最後兩場主場（包括今場）都有電視直播，似乎唔怕票房受影響。梗係啦，福岡衝日職已經成為當地球迷嘅焦點，唔驚門票滯銷，反而擔心向隅Fans太多，所以就提前公布直播消息，呢一點亦反映出福岡管理層爭升班嘅決心。

除咗決心大，福岡最近7次响Levels球場對FC橫濱，取得4勝2和1負，勝率超過57個巴仙，今日贏好正常。問題係佢哋件中場鈴木惇傷咗，未知出唔出得，如果用中原秀人頂佢，攻擊力會削弱，只有寄望末吉隼也、城後壽踢得再Sharp啲。不過，福岡呢隊波守強攻弱，今季連盃賽有13場波只贏1:0，咁啱橫濱前鋒三浦知良養傷之後，龍門南雄太上晒身，3連和兼連續兩場冇失波，肯定會縮响後面阻頭阻勢，相信福岡贏都唔慌係大炒，狠些少博個3.25倍「讓球和」都得。