英超同晚上演另一仗係南部打吡修咸頓主場迎戰升班馬般尼茅夫，雙方上周中英聯盃命運迥異，修咸頓力挫阿士東維拉打入8強，而且佢哋連續兩場於主場出擊，士氣、體力都贏晒3連敗頹爆嘅般尼茅夫，修咸頓即使讓到一球仍可照捧上盤。

（now 621周一凌晨零時直播）

「聖人」修咸頓喺領隊朗奴高文調校下愈踢愈弗，近6仗錄得4勝2和不敗佳績，包括上周中喺主場英聯盃擊敗阿士東維拉，其中着晒火嘅意大利國腳加斯安奴柏利又有士哥，今季喺各項賽事已累積8個入球，加埋沙迪奧文尼、杜辛泰迪治雙翼齊飛，攻擊力有保證，主場出擊唔愁入唔到波。

般尼茅夫防線曳
般尼茅夫近期認真黑仔，除首席射手哥林威爾遜重創提早收咧，麥斯格拉度、守將泰朗明斯和隊長湯美艾菲克都加入傷兵行列，雖然球隊上周中喺英聯盃輸波出局可以專心應付護級戰，不過以佢哋近兩場聯賽對曼城、熱刺分別都失5球嘅防線表現嚟睇，今場作客聖人都係輸少多贏，主隊讓一球，一於捧上盤。