魔獸發火衝擊硬爆機員
當謝拉特、林柏特、派路等星級老將嚟到美職，諗住搵到第二春，但年紀大就機器壞，佢哋幾個真係老嘞，幫唔到所屬球會好多。唯一例外係杜奧巴，佢簡直係足壇奇葩，成37歲人都依然弗爆，上場喺美職季後賽首圈主場對ＦＣ多倫多又建一功，加盟蒙特利爾衝擊踢咗十二仗入十二球，果然係「魔獸」！聽朝衝擊喺四強首回合主場對哥倫布機員，衝擊讓平半，上盤值捧！

（TVB 302周一早上8時直播）

蒙特利爾衝擊喺上季常規賽最終排東岸第十，即係包尾，但今季以東岸第三名殺入季後賽，杜奧巴可以話居功至偉。「魔獸」來投唔單止振奮其他衝擊球員士氣，最緊要係佢真係交到貨，而且效率極高，為衝擊上陣十二場就入咗十二球，包括上場對ＦＣ多倫多嘅士哥，協助衝擊以3比0大炒對手，首次晉級東岸四強。杜奧巴賽後仲High爆帶領隊友跳舞慶祝，就知球隊士氣高昂，夠晒團結。

哥倫布機員今季常規賽兩對衝擊全敗，當時嘅衝擊仲未有杜奧巴在陣，依家有埋「魔獸」更係如虎添翼啦！衝擊近四仗全勝，只係失咗一球咁大把，又有托弗嘅杜奧巴助陣，今場上盤唔怕追呀！

紅牛讓波捧華盛頓
東岸另一場四強首回合大戰就由華盛頓聯隊主場對紐約紅牛，華盛頓聯隊近四次主場對紅牛錄得三勝一和佳績，今場受讓捧得過！

（周一凌晨4時開賽）

伐木者踢殘白帽受讓咪走寶
西岸季後賽四強首回合賽事，早場先由波特蘭伐木者主場迎戰溫哥華白帽，伐木者上場淘汰賽同肯薩斯體育會激戰百二分鐘，互射12碼階段贏7比6驚險晉級，反觀白帽養精蓄銳，今場有得受讓梗係要捧啦！

（TVB 301周一早上6時直播）

波特蘭伐木者上場同肯薩斯體育會打得超激，90分鐘打和1比1，去到加時階段雙方再各入一球賽和2比2，要靠12碼分勝負，結果兩軍創出美職史上最長12碼，一共射咗廿二球，直至伐木者守門員阿當拿臣射入，並撲出對方門將嘅射門，呢場「12碼馬拉松」大戰先結束，伐木者贏7比6出線。

伐木者抖咗兩日左右就要踢今場四強戰，真係戥班球員辛苦，體力肯定比對手輸蝕，加上溫哥華白帽近六次作客伐木者僅得一敗，今場首回合作客打和都係一個唔錯嘅結果，次回合返到主場先搞掂對方都唔遲，白帽受讓值得捧場。

海灣者狙擊達拉斯
尾場就由西雅圖海灣者主場硬撼FC達拉斯，海灣者一對箭頭丹普西同馬田斯近期頻頻入波，係球隊攻力保證，今仗主場出擊更要全力爭勝，防守等次回合作客先啦，今場一於博入球大！