萬聖節睇「寸王」生死戰，真係Perfect Match！英超早場大戰，車路士主場硬撼利物浦，莫連奴同高普兩大名帥首次喺英超碰頭，但亦有可能係最後一次！事關「寸王」今季落難，啱啱又喺英聯盃出局，賽前傳出車仔若對紅軍再有差池，佢就會即時落鑊炒魷！高普則喺英聯盃取得領軍首勝，氣勢上升，而佢之前帶領多蒙特更剋住「寸王」，紅軍今場受讓捧得過！

（now 621周六晚8時45分直播）

英聯盃出局士氣頹爆
車路士今季喺英超10戰僅得11分，得失球差係-4，成為英超史上頭10戰成績最差嘅衞冕冠軍。現時球員信心盡失，連平時又Cool又型嘅Special One（特別的一個）莫連奴都方寸大亂，先公開批評泰利、夏薩特等球星表現唔掂，又不斷抨擊球證同英足總，上場聯賽不敵韋斯咸後「寸王」更被指用粗口鬧球證所以被逐，面臨停賽，但由於英足總會喺今場賽後先有裁決，莫連奴今場仍可陣前督師。不過，咁都好難扭轉「寸王」嘅命運，上場英聯盃作客史篤城激戰百二分鐘後射輸12碼出局，一班球員冇態冇鬥志，體能又輸蝕，前鋒迪亞高哥斯達更整傷肋骨，今場缺陣，車仔仲有乜嘢本錢可以讓利物浦先？

嚟到利物浦第一日就自稱係Normal One（普通的一個）嘅高普，領軍4戰終於上仗英聯盃小勝般尼茅夫1比0開齋。高普呢場派出大量副選，拉爾拉拿、菲臘比古天奴、馬馬度沙高同賓迪基等主力終於都可以抖一抖，全力迎戰車仔。

賓迪基掛帥火力猛
紅軍喺高普調教下，信心、鬥志明顯增強，防守亦有改善，上場聯賽對修咸頓頂入靚頭槌嘅賓迪基亦證實膝傷冇大礙，今場應可披甲，加上另一貴價新兵羅拔圖法明奴傷愈復出後，狀態愈嚟愈好，勢必提升紅軍戰鬥力，仲有得受讓咁筍，當然力撐下盤。

事實上，高普呢個Normal One正係Special One嘅剋星，曾帶領多蒙特喺歐聯4次對住由莫連奴領軍嘅皇馬，成績係2勝1和1負，包括喺2013年歐聯4強首回合帶領「蜜蜂軍團」大炒皇馬4比1，搞到皇馬即使喺次回合贏番2比0，但總比數仍以3比4出局，而莫連奴過咗冇耐亦離開皇馬。高普今場隨時再送「寸王」一程，等莫帥喺萬聖夜變成「無主孤魂」呀陰功！