上周同讀者傾過有關評級指數嘅嘢，並貼中史雲斯平手盤，係經過數據分析得出來嘅結果，而非盲目亂估。今日重心推介場次又係有史雲斯，佢哋今周英超主場迎戰阿仙奴，數據顯示「天鵝」逢親喺自己地頭出戰「兵工廠」阿仙奴，經常出現大手交易，1.68倍入球大宜趁早持有。

（now 623周六晚11時直播）

史雲斯與阿仙奴同屬英超「技術流」表表者，大家都注重控球同地面組織，因此進攻嘅質素甚有保證。此外阿仙奴今季聯賽作客轟入11球，僅次於「神經刀」韋斯咸，乃英超客場第二大火力，我哋嘅數據分析員指出，由於英超球隊普遍主場出擊都唔會打守勢波，形成阿仙奴於作客爭取士哥，比喺主場更加容易。

華倫讓得辣轉捧大盤
翻查資料，史雲斯自從2011年升上英超後，連盃賽5次喺自己地頭迎戰阿仙奴，有4次開出入球大，就算冇開大盤嗰次，都產生兩個士哥，唔慌冇波入。睇埋賠率，今仗入球大被壓到只得1.68倍，再對比番史雲斯今季聯賽嘅入球大賠率，通常介乎1.75倍至2.2位之間，就算對住曼聯同車路士等強隊，都唔及對阿仙奴咁熱，莊家明顯睇好兩軍會合演一場入球騷。況且阿仙奴勁多傷兵，嚟緊又要喺歐聯作客拜仁，今仗仲要讓到半一唔多划算，與其玩盤咁難估，肥叔認為買入球大更加穩陣。

至於西甲「蝙蝠打吡」華倫西亞主場對利雲特，前者今季兼顧歐聯明顯有點顧此失彼，要讓球半太辣，利雲特係態沉排包尾，但啱啱炒咗教練，隨時會反彈，不過肥叔對下盤亦唔多夠信心，而且打吡戰雙方一定搏甩髀，呢場都係揀大盤。

（now 633周日凌晨1時15分直播）