拜仁聯賽橫掃多o趙鋪
周五晚德法西葡賽場非常熱鬧，四路雄師提早出擊，好戲連場！拜仁慕尼黑、巴黎聖日耳門、馬德里體育會、賓菲加為騰出更多時間備戰下周中歐聯大戰，率先於今晚聯賽登場，務求速戰速決，先安內後攘外，力爭贏場漂亮勝仗，為出征歐洲戰場壯行色！
周五德甲獨腳戲強弱懸殊，班霸拜仁慕尼黑作客鬥法蘭克福；拜仁挾開季十連勝德甲歷來最佳開局，當中仲包括5比1大炒禾夫斯堡同多蒙特兩支聯賽潛在最強對手，足見球隊喺國內已難尋敵手，今仗遇上踢法有前冇後，近季又畀拜仁炒慣嘅法蘭克福，可望繼續取得大勝，為下周中歐聯向阿仙奴復仇提升士氣，讓球主客和拜仁讓兩球，黑柴撐2.15倍拜仁讓球客勝。
（now 672、有線61及201台周六凌晨3時30分直播）
拜仁今季喺國內真係打橫行，除咗聯賽所向披靡外，三日前德國盃作客再遇衞冕嘅禾夫斯堡，一樣輕鬆取勝，球隊中前場人腳過剩，所以即使賽前有消息話哥迪奧拿今仗會稍作輪換，湯馬士梅拿同隊長拿姆都可能休息，但前線火力依然強勁。球隊上周中歐聯F組作客輸過畀阿仙奴，下周中主場再遇呢支英超球隊當然想報仇，但對阿仙奴只係下周四凌晨，踢埋今場仲有五日休息時間，拜仁戰將唔需要特別留力，不如盡情大炒對手提升士氣同信心。
法蘭克福防線穿窿
法蘭克福今季獲艾明費回巢執教，踢法明顯更加進取，簡直有前冇後，前線有「足球之神」美亞壓陣更係入球保證，不過佢哋目前只排喺德甲第十二位，主要原因係防線太差，近五場聯賽場場失波共失十一球，何況球隊近六次對拜仁全敗，近三次仲起碼輸三粒，擺明畀「仁」食住，今仗就算主場出擊都凶多吉少。
