新帥接手改頭換面
新式噴射機飛揚澳職！上季衰到貼地嘅紐卡素噴射機，痛定思痛後搵嚟新帥史葛米拿上任，今季成績隨即大有改善，尤其一改上季「紙紮防線」形象。呢部新式噴射機今日下晝將會造訪墨爾本城，有力趁住對手傷兵滿營下再度搶分，既然佢哋今場受讓半一，2.09倍下盤唔好錯過。

（有線64及203台周五下午4:40直播）

噴射機上季表現真係差到冇朋友，常規賽27戰過後，無論進攻（入23球）定防守（失55球）都係聯賽最差，攞得咁嘅數據就自自然然成為上季澳職嘅包尾大幡啦。

墨城7件唔踢得
之不過噴射機季前委任前富咸青年軍教練史葛米拿執教後，表現判若兩隊，開季取得2勝1負不特止，就連為人詬病嘅防線亦大幅改善，暫時只係失守2次，環顧整個聯賽只有榜首FC悉尼叻過佢哋。中場戴夫卡尼更係好似開咗竅咁，上季顆粒無收嘅佢已經攻入2球，加埋門將比列基迪傷愈復出，呢鋪堅唔適宜同轉緊運嘅噴射機作對。

再講，墨爾本城今仗贏波難度唔細，包括前鋒哈利洛維奴、中場高倫、守將艾朗曉士等7件球員唔踢得，實力大打折扣不在話下，特別係防線變得危危乎。據統計，墨城門將蘇連遜暫時有13次成功撲救，叻過晒其他門將，轉個角度諗即係對手根本唔愁冇餐士起腳，咁搞法噴射機點會冇搶分機會先！