上季冠軍賓菲加作客新升班球隊唐迪拉，賓菲加上仗打吡戰更吞士砵亭三蛋，下周中歐聯又要同加拉塔沙雷決生死，幸好今仗對弱隊唐迪拉，正好畀部分主力休息，冇必要大炒對手，客W1.18倍熱爆冇肉食，寧揀1.85倍入球細。

（有線155台周六凌晨4時30分直播）

賓菲加今季踢七場聯賽已經輸咗三場，相等於上季葡超總輸波場數，不過聯賽流流長，賓菲加仲有大把機會追，反而歐聯每仗都非常重要，尤其係C組榜首賓菲加只係領先第三位加拉塔沙雷兩分，因此下周中硬撼加拉塔沙雷實在不容有失，估計賓菲加今仗葡超可能會留力，不宜高估。

唐迪拉泊大巴死頂
至於唐迪拉今季升上葡超，八場聯賽僅得一勝二和五負，只入四球，根本未夠班喺葡超立足，今場鬥賓菲加除「泊大巴」死守之外難有其他應付方法，適逢賓菲加狀態麻麻兼要留力，捧細盤啱數。